20.11.2017

خۆبه‌ڕێوه‌به‌ری دیموکراتیک گۆڕه‌پانی ئازادی کوردانه‌

تا کێشه‌که‌ی باکور چاره‌سه‌ر نه‌بێت، کێشه‌که‌ی باشور چاره‌سه‌ر نابێت، هیچ که‌سێک پارێزراو نابێت ...

 

 

 

 

 

 

پێویسته‌ رۆژه‌ڤی راسته‌قینه‌ی کوردان به‌رجه‌سته‌کردنی پرۆژه‌ی خۆبه‌ڕێوه‌به‌ری دیموکراتیک بێت. ئه‌گه‌ر نه‌ته‌وه‌ی دیموکراتیک گیان بێت ئه‌وا خۆبه‌ڕێوه‌به‌ری دیموکراتیک جه‌سته‌یه‌، حاڵه‌تی به‌رجه‌سته‌بووی بونیادنانی نه‌ته‌وه‌ی دیموکراتیکه‌. خۆبه‌ڕێوه‌به‌ری دیموکراتیک چه‌ند بوارێکی هه‌یه‌، ده‌توانین به‌م شێوه‌یه‌ گوزاره‌ی لێوه‌ بکه‌ین:

1ـ بواری سیاسی: لێره‌دا گه‌ل یان ئه‌نجومه‌نێک یان کۆنگره‌یه‌کی کۆمه‌ڵگای دیموکراتیک له‌ کاردایه‌. ئه‌م کۆنگره‌یه‌ش ده‌سته‌یه‌کی بچوکی به‌ڕێوه‌به‌رایه‌تی ده‌بێت.

2ـ بواری حقوقی: ده‌ربڕی له‌ ستاتۆ و پێگه‌ی حقوقی پرۆژه‌ی خۆبه‌ڕێوه‌به‌ری دیموکراتیک ده‌کات. له‌ لایه‌نی حقوقییه‌وه‌ چۆنێتی ئاستی ستاتۆی کورد به‌ ده‌ستور و یاسا گشتییه‌کان ده‌گه‌یه‌نێت.

3ـ بواری ئابوری: نه‌ته‌وه‌ی دیموکراتیک دامه‌زرا و سیاسه‌تێکی ئابوریشی ده‌بێت. ده‌ستنیشانی ده‌کرێت ئابورییه‌کی چۆن پێویسته‌. پێگه‌ی سیاسی به‌نداوه‌کان، سه‌رچاوه‌ سروشتییه‌ سه‌رخان و ژێرخانه‌کان و ئاست و چۆنێتی وه‌رگرتنی باج ده‌ستنیشان ده‌کرێ، ناتوانین سیستمی سه‌رمایه‌داری وه‌ک سیستمی ئابوری به‌هه‌ند وه‌ربگرین یان په‌سه‌ندی بکه‌ین. ده‌شێ به‌ ته‌واوی نه‌توانین سیستمی سه‌رمایه‌داری ده‌رباز بکه‌ین، به‌ڵام ده‌کرێ له‌ ئاستێکی گرنگدا گۆڕانی به‌سه‌ردا بهێنێ و بێ‌نرخی بکات، سیستمی ئابوری خۆمان دابمه‌زرێنین. له‌م سیستمه‌دا سیستمی ئابوری گه‌ل ده‌بێت، به‌شێکیشی ئابوری تایبه‌تی پێک ده‌هێنێت. واتا کۆمپانیای تایبه‌تی ده‌بن.

4ـ بواری کلتوری: زمانی زیاتر، په‌روه‌رده‌ به‌ زمانی زیگماکی، مێژوو و هونه‌ر ده‌گرێته‌وه‌. ده‌بێ په‌یوه‌ندی کوردی به‌ تورکییه‌وه‌ چی بێت، ده‌کرێ چۆن به‌ زمانی زیگماکی په‌روه‌رده‌ بکرێ، ده‌بێ سیاسه‌تێکی "زمان"ی نه‌ته‌وه‌ی دیموکراتیک چۆن بێت، ده‌بێ سه‌رجه‌م ئه‌مانه‌ تاوتوێ بکرێن. سیاسه‌تێکی په‌روه‌رده‌ دیار بکرێت. گفتوگۆ له‌سه‌ر ئه‌وه‌ بکرێ که‌ کورد چۆن بتوانێ به‌ ته‌واوی له‌ ژینوسایدی کلتوری رزگاری ببێ، و پێویسته‌ له‌و ژینوسایدی کلتورییه‌ رزگاری ببێت.

5ـ بواری پاراستنی جه‌وهه‌ری: ده‌شبێ به‌ بواری ئاسایش به‌ ناوی بکه‌ین. له‌ به‌رامبه‌ر ژینوسایدی کلتوری کورد و هه‌موو جۆره‌ ژینوسایدێک، پاراستنی جه‌وهه‌ری دابمه‌زرێنێت. به‌رگری ره‌وا وه‌ک رێبازی ده‌ستکردی چه‌کداری که‌جه‌که‌ و په‌که‌که‌ نا، به‌ڵکو ده‌سته‌به‌رکردنی خۆپاراستنی گه‌له‌. له‌ هه‌موو بواره‌کاندا خۆڕێکخستنی کۆمه‌ڵگای دیموکراتیک، به‌ده‌زگابوون و گه‌یاندنی به‌ سیستمی ئاسایش و خۆپاراستنی خۆی. ده‌کرێ گه‌ل ئه‌م خاڵه‌ تاوتوێ بکات و به‌ ئه‌نجامی جیاواز بگات. بۆ نمونه‌ منداڵه‌کانیان بنێرن بۆ سه‌ربازی؟ له‌ سه‌ربازی و سوپادا جێ بگرن؟ ئه‌مانه‌ تاوتوێ بکرێن. بۆ نمونه‌ جاشه‌کان چۆن لاببرێن، مه‌سه‌له‌ی جاشایه‌تی چۆن چاره‌ بکرێ، ئه‌مانه‌ پێوسته‌ تاوتوێ بکرێن. پاراستنی جه‌وهه‌ری گه‌ل له‌ نان و ئاو گرنگتره‌، ئه‌مه‌ نه‌بێت ناژی.

6ـ بواری دیپلۆماسی: کوردان په‌یوه‌ندییه‌کانی له‌گه‌ڵ‌ گه‌لانی دیکه‌، وڵاتانی دراوسی و کوردانی پارچه‌کانی دیکه‌ بخه‌نه‌ به‌ر باس و گفتوگۆوه‌، خواستی په‌یوه‌ندی له‌گه‌ڵ‌ کۆمه‌ڵگاکانی تر و چۆنێتی ژیانی له‌گه‌ڵیاندا تاوتوێ بکات.

ئه‌مه‌ چوارچێوه‌یه‌که‌، هێڵه‌ سه‌ره‌کییه‌ گشتییه‌کان ئه‌وانه‌ن. تایبه‌ت به‌هه‌ر یه‌کێک له‌م بوارانه‌ کۆمسیۆنی تایبه‌تی هه‌بن، کار و خه‌بات له‌سه‌ر ئه‌مانه‌ بکرێن. پێویسته‌ بابه‌تی خۆبه‌ڕێوه‌به‌ری دیموکراتیک گرێدراو به‌و قۆناخه‌ی ئاماژه‌م پێکرد هه‌ڵسه‌نگێندرێت. ئێستاکه‌ له‌ناو قۆناخێکی گواستنه‌وه‌داین. خۆبه‌ڕێوه‌به‌ری دیموکراتیک گۆڕه‌پانی ئازادی کوردانه‌. پشت به‌ سنوری نیشته‌جێی هاوڵاتیان و جوگرافی نابه‌ستێ، بۆ یه‌کینه‌کانی کۆمه‌ڵگای دیموکراتیک ده‌گه‌ڕێته‌وه‌. هه‌ر چین و توێژێکی کۆمه‌ڵایه‌تی، یه‌کینه‌یه‌کی کۆمه‌ڵگای دیموکراتیکه‌، پێکهێنانی به‌ڕێوه‌به‌رایه‌تی گه‌وهه‌رییه‌تی. نه‌ک به‌ "خۆبه‌ڕێوه‌به‌ری دیموکراتیک راده‌گه‌یه‌نین" به‌ڵکو ده‌بێ بوترێ "به‌ڕێوه‌به‌رایه‌تی جه‌وهه‌ری دیموکراتیک بونیاده‌ ده‌نین". ئه‌مه‌ راگه‌یاندنی شه‌ڕ نیه‌، کاروباری سازدان و رێکخستنی دیموکراتیکه‌. ئه‌مه‌ به‌ هه‌موو گۆڕه‌پانه‌کاندا به‌ربڵاو ده‌کرێته‌وه‌. هه‌ر له‌ یانه‌کانی وه‌رزشه‌وه‌ بگره‌ تا دامه‌زراوه‌ هه‌روه‌زییه‌کان "کۆپه‌راتیف"ه‌کان، هه‌موو گۆڕه‌پانه‌کانی کۆمه‌ڵگا خۆی رێک ده‌خات. ده‌بێ وه‌ک پلاتفۆرم یان کۆنفیدراسیۆنێکی سه‌رجه‌م رێکخراوه‌کانی کۆمه‌ڵگای مه‌ده‌نی بێت. له‌ چوارچێوه‌ی ئه‌و شه‌ش بواره‌ی ئاماژه‌م پێدا، با خۆبه‌ڕێوه‌به‌ری دیموکراتیک وه‌ک پرۆژه‌یه‌کی چاره‌سه‌ری په‌ره‌ی پێ بده‌ن و به‌رجه‌سته‌ی بکه‌ن. ئه‌گه‌ر له‌ دوای هه‌ڵبژاردنه‌کان ده‌وڵه‌ت دوای پێشنیازی چاره‌سه‌ری لێ کردن، با پرۆژه‌یه‌کیان هه‌بێت بۆ چاره‌سه‌ری.

وه‌ک له‌ راگه‌یاندنه‌کاندا ده‌رکه‌وت، شاندی کۆنگره‌ی کۆمه‌ڵگای دیموکراتیک چاویان به‌ تاڵه‌بانی که‌وتووه‌. دیاره‌ ئه‌رێنی بووه‌ و له‌ بابه‌تی کۆنفڕانسی نه‌ته‌وه‌ییدا هاوبیر بوون، (PKK)ش به‌شدار ده‌که‌ن، وایه‌؟ ئه‌م کاره‌ زۆر گرنگه‌. سڵاوم به‌ تاڵه‌بانی بگه‌یه‌نن، به‌ناوی منه‌وه‌ پێی بڵێن:"به‌ڕێز تاڵه‌بانی؛ ئۆجالان ده‌ڵێت، وه‌رن ببن به‌ وته‌بێژی کۆنفرانسی نه‌ته‌وه‌یی، نوێنه‌رایه‌تی هه‌موو کوردان بکه‌ن، نه‌ک هه‌روا وه‌ک سه‌رۆک کۆماری ئێراق، وه‌ک وته‌بێژی کوردان له‌ سوریا، ئێران، ئێراق، تورکیا و هه‌موو کوردان و ئه‌م کێشه‌یه‌ بۆ دنیا باس بکه‌ن. ئه‌مه‌ واتادارتر و به‌هادارتره‌".

تا کێشه‌که‌ی باکور چاره‌سه‌ر نه‌بێت، کێشه‌که‌ی باشور چاره‌سه‌ر نابێت، هیچ که‌سێک پارێزراو نابێت. تێگه‌یشتنیان له‌مه‌ گرنگه‌. پێویسته‌ بزانن که‌ مه‌ترسی گه‌وره‌یه‌ و  هه‌موو کوردانی گرتۆته‌وه‌. پێویسته‌ به‌ تاڵه‌بانی و بارزانی بوترێ "ئه‌گه‌ر ئه‌مجاره‌ عه‌ره‌ب به‌سه‌رتاندا بێن، یه‌ک که‌ستان لێ ناهێڵن"، پێویسته‌ باش له‌مه‌ تێبگه‌ن. بۆ ئه‌مه‌یه‌ باس له‌ کۆنفرانسی نه‌ته‌وه‌یی ده‌که‌م. وه‌رن با نوێنه‌رایه‌تییه‌کی هاوبه‌ش، به‌رگرییه‌کی هاوبه‌ش پێک بهێنین که‌ هه‌موو کوردان بگرێته‌وه‌. بڕوا ناکه‌م بارزانی و ئه‌وان له‌ باشور به‌سه‌ر هێزه‌کانی ئێمه‌دا بێن. ئه‌گه‌ر به‌ سه‌ریشماندا بێن به‌ر له‌ هه‌موو شتێک له‌ قاچ و پێی خۆیان ده‌ده‌ن. جارێکی تر سڵاوم به‌ تاڵه‌بانی و به‌ بارزانی بگه‌یه‌نن.

له‌وانه‌یه‌ کۆنفرانسی نه‌ته‌وه‌یی هه‌ندێک کاتی بوێ، گرنگ به‌ڕێوه‌بردنیه‌تی. ده‌بێ هه‌موو چین و توێژێکی کورد به‌شداری بکه‌ن. پێشتر له‌م مژاره‌دا باسم له‌ چوار پره‌نسیپی تێوری و سێ پێشنیازی کرداری کردبوو. به‌تایبه‌تی پراکتیزه‌کردنی سێ پێشنیازه‌که‌ گرنگه‌. یه‌که‌میان: پێکهێنانی ده‌زگایه‌ک له‌ شێوه‌ی په‌رله‌مانێکی هاوبه‌ش که‌ وه‌ک میکانیزمایه‌کی بڕیاروه‌رگرتنی کوردان کار بکات. له‌ په‌رله‌مان زیاتر، ده‌کرێ وه‌ک "شۆرای نه‌ته‌وه‌یی کوردستان" ناوزه‌د بکرێت. به‌ڕاده‌یه‌ک له‌ رێکخستنی رزگاری فه‌ڵه‌سه‌تین ده‌چێ. دووه‌میان: دامه‌زراندنی به‌ڕێوه‌به‌ری و جێبه‌جێکاری ئه‌و بڕیارانه‌ی که‌ له‌ خاڵی یه‌که‌مدا وه‌رده‌گیرێ. سێهه‌م: پێکهێنان و دامه‌زراندنی هێزی به‌رگری ره‌وای هاوبه‌ش. تا پاراستن و ئاسایشی گه‌لی کورد گه‌رانتی نه‌کرێ، با که‌س باس له‌ ئاشتی و چه‌کدانان نه‌کات. مه‌ترسی قڕکردن له‌ ئارادایه‌. ئه‌وانه‌ ده‌رفه‌تیان ده‌ست بکه‌وێ، هیچ درێخی ناکه‌ن له‌ قڕکردنی کوردان.به‌رگری گه‌وهه‌ری کوردان له‌ پێناو پاراستنی هه‌بوونی خۆیان، بنه‌ڕه‌تترین مه‌رجه‌. ته‌نیا به‌ گه‌ریلا و به‌ هێزه‌کانی پاراستنی گه‌ل (HPG)ه‌وه‌ سنووردار نیه‌، هه‌موو که‌سێک به‌رپرسیاره‌ له‌ به‌رامبه‌ر ئه‌مه‌دا. تاکه‌کانیش ده‌بێ خۆیان به‌رگری و پاراستنی خۆیان ده‌سته‌به‌ر بکه‌ن، گه‌لیش ته‌کبیری خۆی وه‌ربگرێت. با که‌س منداڵ و لاوی خۆی نه‌نێرێت بۆ سه‌ربازی و بۆ خزمه‌تی سوپای ده‌وڵه‌تان.

به‌ کورتی به‌ پێویستی ده‌زانم ئاماژه‌ به‌و دیدار و دانیشتنانه‌ی ئه‌م دواییه‌ش بکه‌م. ئه‌و دیدار و دانیشتنانه‌ی لێره‌ ئه‌نجامیان ده‌ده‌م تا بڵێی واتادار و مێژوویین. ته‌قینه‌وه‌یه‌که‌ی له‌ هه‌کاری، به‌ر له‌م دانیشتنه‌مان زۆر سه‌رنجڕاکێشه‌. پێویسته‌ لێکۆڵینه‌وه‌ی فره‌لایه‌نه‌ی ئه‌م رووداوه‌ بکرێت. به‌و ته‌قینه‌وه‌ی هه‌کاری دانیشتنه‌کانی ئێره‌ بۆردومان کرا. ئه‌م دیدارانه‌ تا بڵێی به‌ به‌رهه‌م بوون، هیوادار بووم. هه‌رکات له‌ تورکیادا پێشکه‌وتن و گۆڕانکاری ئه‌رێنی له‌م مژاره‌دا بێته‌ کایه‌وه‌، به‌ چالاکییه‌کی وه‌ها گێره‌شێوێنانه‌ ئه‌م پێشکه‌وتنانه‌ کۆت و به‌ند ده‌که‌ن. ئامانجی سه‌ره‌کییان لێره‌دا، ئه‌و ئه‌نجامه‌ مێژووییانه‌ن که‌ له‌ دانیشتنه‌کاندا پێیان ده‌گه‌ین. له‌ دوای دانیشتنه‌که‌ی ئه‌و رۆژه‌ی رووداوه‌که‌ له‌ هه‌کاری رووی دا، دانیشتن نه‌کراوه‌.

ئه‌نجامی دانیشتنه‌کانی ئێره‌ له‌سه‌ر گه‌یشتن به‌ دوو رێکه‌وتنی سه‌ره‌تایی دوولایه‌نه‌ لێک ده‌ده‌مه‌وه‌. یه‌که‌میان رێکه‌وتن له‌ بواری ئاسایش و پاراستن، له‌گه‌ڵ‌ که‌جه‌که‌ و په‌که‌که‌ پێکه‌وه‌ به‌ڕێوه‌ی ده‌به‌م، ئه‌وان پابه‌ند ده‌بن به‌مه‌وه‌. پێویسته‌ دیالۆگی وته‌نی و نوسراوه‌م له‌گه‌ڵ‌ که‌جه‌که‌ و په‌که‌که‌م هه‌بێت، پێویسته‌ هه‌لومه‌رجی ژیانم به‌پێی ئه‌مه‌ بگونجێنن. ئه‌وه‌ی تریشیان رێکه‌وتنی مافه‌ دیموکراتیکه‌کان و ده‌ستوری گشتییه‌. بۆ ئه‌مه‌ش پارتی ئاشتی و دیموکراتیک و کۆنگره‌ی کۆمه‌ڵگای دیموکراتیک هه‌ن. پێویسته‌ له‌گه‌ڵ‌ ئه‌مانه‌دا دابنیشم و له‌ هاوبیریدا بین. پێویسته‌ له‌گه‌ڵ‌ ئه‌مانه‌دا دیالۆگم هه‌بێت، پێویسته‌ هه‌لومه‌رجی دانیشتنم له‌گه‌ڵ‌ سیاسه‌تمه‌دارانی دیکه‌ که‌ پارێزه‌ر نین بڕه‌خسێنرێت. به‌م شێوه‌یه‌ پێشکه‌شکردنی رێکه‌وتنه‌کان به‌ په‌رله‌مانی دوای هه‌ڵبژاردن دێته‌ پێشه‌وه‌. لێره‌دا دوو کۆمیسیۆن پێک ده‌هێنرێت. یه‌کیان کۆمیسیۆنی ئاماده‌کاری ده‌ستوری گشتی ده‌بێ، باس له‌و کۆمسیۆنه‌ ناکه‌م که‌ ئێستاکه‌ له‌ ئه‌نجومه‌ندایه‌. ئه‌رک و رۆڵی ئه‌و جیاوازه‌. مه‌به‌ستم له‌و کۆمسیۆنه‌یه‌ که‌ گه‌ڵاڵه‌ی ئه‌نجامی گفتوگۆکانی له‌باره‌ی ده‌ستوری گشتی نوێ پێشکه‌ش به‌ په‌رله‌مانی دوای هه‌ڵبژاردنه‌کان بکات.

دووه‌میان، کۆمسیۆنی لێکۆڵینه‌وه‌ له‌ راستییه‌کانه‌. ئه‌م کۆمسیۆنه‌ش تێکڕای رووداوه‌کانی "بکه‌ری نادیار"ی وه‌ک رووداوه‌که‌ی ئه‌م دواییه‌ هه‌کاری و له‌ ئه‌رگه‌نه‌کۆن ده‌کۆڵێته‌وه‌ و به‌رپرسیاره‌کانی ده‌رده‌خاته‌ روو. قۆناخ به‌م شێوه‌یه‌ جێبه‌جێ ده‌بێت. هه‌شت مانگمان له‌ پێشه‌، چاوه‌ڕێی قۆناخی ئاماژه‌ پێکراو ده‌بم، جا ده‌بینین میکانزمه‌ کارا ده‌بێت یان نا. ئه‌گه‌ر ببێ، ده‌ربازی قۆناخی ئه‌و رێکه‌وتنانه‌ ده‌بین که‌ ئاماژه‌م پێکردن. ئه‌گه‌ر ئه‌مه‌ش بوو، قۆناخ به‌ره‌و ئاشتی هه‌تاهه‌تایی ده‌چێت. ئه‌گه‌ر وه‌ها نه‌چێت، ره‌نگه‌ "شه‌ڕی شۆڕشگێڕی به‌رفراوانی گه‌ل" بێته‌ ئاراوه‌. ئه‌گه‌ر باسی ئه‌گه‌ریش بکه‌ین، چۆن پێشتر به‌و قۆناخی دانیشتنانه‌ی لێره‌ ده‌ستیان پێکرد له‌ سه‌دا په‌نجام وتبوو، ئێستاش له‌ هه‌مان خاڵدام ته‌نانه‌ت ده‌توانم بڵێم تۆزێک له‌ دواتره‌وه‌ش.

به‌ ناوی منه‌وه‌ سڵاو له‌ هه‌موو ئه‌و که‌سانه‌ بکه‌ن که‌ به‌شداری دانیشتنه‌کان بوون، له‌گه‌ڵ سڵاوی تایبه‌تیشم به‌ گه‌ل.

پێشنیاری من به‌ نمونه‌گرتنی ده‌ستوری گشتی ساڵی "1921"ه

نه‌ ئێمه‌ی کورد ده‌توانین ده‌وڵه‌تی تورک له‌نێو ببه‌ین، نه‌ ده‌وڵه‌ت ده‌توانێ بزووتنه‌وه‌ی ئازادی کورد پاکتاو بکات. که‌واته‌ بۆ راوه‌ستاندنی ئه‌م خوێنه‌ با رێگه‌ی دیالۆگ بگرینه‌به‌ر ...

ده‌شێ شه‌ڕێکی سه‌دساڵی کورد و تورک ده‌ست پێ بکات

خۆبه‌ڕێوه‌به‌ری دیموکراتیک بونیادنانى ده‌وڵه‌ت نیه‌، رێکخستنێکی دیموکراتیکه‌ که‌ هه‌موو گروپه‌ کۆمه‌ڵایه‌تییه‌کان ده‌توانن تێیدا جێ بگرن به‌ تورکمان و ئاشوری و ...

پێشنیار کۆمیسیۆنی دادوه‌ری و راستییه‌کان له‌گه‌ڵ سازکردن کۆنفرانسێک

«دامه‌زراندنى کۆمسیۆنى داد و راستییه‌کان له‌ په‌رله‌ماندا، وه‌ک سه‌ره‌تا و هه‌نگاوى کردارى زۆر گرنگه‌، پێویسته‌ ئه‌و کۆمیسیۆنه‌ له‌ په‌رله‌ماندا دابمه‌زرێت و له‌ ژێر چاودێرى ئه‌ودا بێت.» ...

چاوپێكەوتنی سەرۆك » مقالات أخرى

به‌ هیچ شێوه‌یه‌ک رێگه‌ ناده‌م که‌س یارى به‌ که‌رامه‌تی کوردان بکات

پرۆژه‌ی سه‌ره‌کیمان چاره‌سه‌ری دیموکراتیکه‌

ستراتژی پاکتاوکردن له‌ (1925)ه‌وه‌ په‌یڕه‌و ده‌کرێت

کات کاتی یه‌کێتی نه‌ته‌وه‌یيه‌

رژێمی ئایه‌توڵای ئێران تا دواڕاده‌ سه‌رکوتکار و بێ‌ویژدانه‌

دۆخی ئێستا ده‌ستکه‌وتێکی سه‌رتاسه‌ری کوردانه‌

پێویستی به‌ لۆزانی کۆمه‌ڵایه‌تی هه‌یه

ئێمه‌ کێشه‌یه‌کی شه‌ش سه‌ده‌یی چاره‌سه‌ر ده‌که‌ین

گه‌ر ئێوه‌ ئاماده‌ن چه‌که‌کانتان راده‌ستی ئه‌مریکا بکه‌ن ئێمه‌ش ئاماده‌ین

من پێنج پره‌نسیپ ده‌خه‌مه‌ به‌رده‌م کۆنفڕانسی نه‌ته‌وه‌یی

به‌ هیچ شێوه‌یه‌ک مۆڵه‌ت ناده‌م که‌سێ یاری به‌ گه‌لی کورد بکات

نه‌ته‌وه‌ی دیموکراتیک چاره‌سه‌ری راسته‌قینه‌ی کێشه‌ی کۆمه‌ڵگانه‌

پێشنیاری من به‌ نمونه‌گرتنی ده‌ستوری گشتی ساڵی "1921"ه

ده‌شێ شه‌ڕێکی سه‌دساڵی کورد و تورک ده‌ست پێ بکات

پرسى ئێمه‌ له‌گه‌ڵ هێزه‌ قه‌واره‌پارێزه‌کانه‌ که‌ ناڕه‌وایى مێژووییان له‌ کوردان کردووه‌

2017 © Partiya Karkerên Kurdistan (PKK)
[email protected]