19.10.2017

به‌ دوای ناموس‌دا

ناموس چڵکی ده‌ستی پیاوه‌ و په‌ڵه‌یه‌کی ره‌شه‌ که‌ له‌ ته‌وێڵی ژن هه‌ڵسواوه‌ ...

 

 

 

 

 

په‌لشین تۆڵهه‌ڵدان

ناموس، قه‌فه‌زێکى پۆڵایینه‌ که‌ تێیدا به‌ند کراوین. درۆیێکى داپۆشراو و له‌ باوه‌ش نراوه‌ که‌ وا ده‌زانی ده‌رگایه‌ و له‌سه‌ر پشته‌، ره‌نگه‌ هه‌ڵبفڕێ و خۆت به‌ ئازاد له‌ قه‌ڵه‌م بده‌یت. هه‌ڵفڕین و هه‌ڵاتن سه‌ربه‌سته‌ بۆ که‌سێ نرخه‌که‌ى به‌ گیان کڕیبێ یان به‌ ئاره‌زوى خۆت ده‌چیته‌ نێو قه‌فه‌زه‌که‌ى یاخود له‌ قه‌فه‌زه‌که‌یدا زینده‌به‌ند ده‌کرێی. ئه‌مه‌ دوانه‌یه‌کی وه‌ها تووک لێگیراو و نه‌فره‌تییه‌ی بێ بژارییه‌کی ئه‌وه‌نده‌ پڕ له‌ بژاره‌ که‌ ژن له‌ قووڵایی ناخییه‌وه‌ نه‌فرینه‌که‌ی ده‌ژی. جار هه‌یه‌ ناهێڵێ ژیانت دیار بکه‌یت، به‌ڵام ئه‌م ئازادییه‌ت پێ ده‌به‌خشێ که‌ مه‌رگی خۆت دیار بکه‌یت. ناموس بۆته‌ سێبه‌ری سه‌ر ژن که‌ هه‌تا مردن له‌ کۆڵی نابێته‌وه‌. چڵکی ده‌ستی پیاوه‌ و په‌ڵه‌یه‌کی ره‌شه‌ که‌ له‌ ته‌وێڵی ژن هه‌ڵسواوه‌ و ئه‌نجا به‌ خوێن بشۆردرێته‌وه‌. ناموس فه‌رمانی هه‌میشه‌یی کوشتنم، پادشای زۆره‌ و کاتێکی تایبه‌تی نیه‌. چه‌کێکی داب و نه‌ریته‌ و له‌مێژه‌ پیاو به‌نێو چاوانمییه‌وه‌ ناوه‌. شیوه‌نێکی به‌ ژان و سوێیه‌ که‌ ئاوازه‌که‌ی ته‌نیا له‌ زمان و دڵی ژنه‌وه‌ هه‌ڵده‌ڕژێ. ئه‌وان ته‌رمه‌که‌م ده‌شۆن و هه‌ر ئه‌وانیش له‌ دوایین تاسه‌ی هه‌ناوم تێده‌گه‌ن و ئاخ و داخی من له‌ کۆڵ‌ ده‌نێن و به‌خێوی ده‌که‌ن. نازانم کێ له‌ ئاخی من ده‌ترسێ، به‌ڵام ئاخی من ده‌ست له‌ یه‌خه‌ی خاکه‌که‌م به‌رنادات، ده‌ست له‌ یه‌خه‌ی کۆمه‌ڵگاش... ناموس؛ تاجه‌کڵاوی زێڕینه‌ که‌ سه‌رمی پژاندووه‌. ناموس؛ که‌له‌پچه‌ و ده‌سبه‌ندی زێڕینم که‌ ده‌سته‌کانمی به‌ خوێن نه‌خشاندووه‌. ناموس؛ کلیلێکی زێڕین که‌ شه‌ڕافه‌تی بریندار کردووم. ناموس؛ چه‌قۆیه‌کی زێڕین که‌ به‌رهه‌م و داهێنان و چێشکه‌ی منی سه‌قه‌ت کردووه‌.

 ناموس؛ دزێک له‌ په‌نجه‌ی ئه‌نگوستیله‌م دا که‌ ته‌مه‌نم ده‌دزێ. ناموس؛ سێبه‌رم. ناموس؛ مۆرێکی هه‌ڵکه‌نراو له‌سه‌ر به‌خت و مێژووی شکستی ژنێتیم. ناموس؛ ئه‌و چاوه‌ی زمان، ده‌ست، چاو و گوته‌کانمان چاودێری ده‌کا. بکوژێک که‌ ته‌نیا خۆی نابینێ. دۆڕاندمان و بۆ ئه‌وه‌ی جارێکی تر سه‌رنه‌که‌وین له‌م په‌یڤه‌دا به‌ندکراین. ناموس له‌ که‌یه‌وه‌ بوو به‌ چاره‌نوسی ژن و فه‌رمانی کوشتنی که‌ هه‌ر له‌ منداڵییه‌وه‌ به‌ ئه‌ستۆیه‌وه‌، چۆن و بۆچی هات؟

گه‌لێک مرۆڤی دیندار بێ‌ بچڕان به‌ ناوی ناموسه‌وه‌ ده‌دوێن، سیاسه‌تی له‌سه‌ر ده‌کرێ. ئه‌م وشه‌یه‌ که‌ ره‌وایه‌تی به‌ یاده‌وه‌ری تاوانی گه‌وره‌ و ره‌شه‌کوژییه‌کان ده‌به‌خشێ، چۆن شێوه‌ی گرتووه‌؟ چۆن ئێستاش وه‌ها هزری ئێمه‌ ره‌واڵه‌تی پێ ده‌دا؟ کێ و بۆ ئه‌مه‌ ده‌خوازێ؟ به‌ بڕوای من پرسێک که‌ ئێمه‌ی ژنان ده‌بێ هه‌ره‌ زێده‌ سه‌رمانی پێوه‌ قاڵ‌ بکه‌ین، له‌به‌ر ئه‌وه‌ی کوشتنمان به‌ تاکه‌وشه‌یه‌ک ره‌وا ده‌کرێ، ناموسه‌!.. ئه‌وانه‌شمان که‌ شانسی مانه‌وه‌یان هه‌یه‌ ئه‌م وشه‌یه‌، به‌ندکران و سه‌رکوتکردانیان ره‌وا ده‌کات. به‌م وشه‌یه‌ یارییه‌کانمان لێ قه‌ده‌خه‌ ده‌کرێ، به‌م وشه‌یه‌ هه‌موو ئازادییه‌کانمان لێ ده‌ستێنرێ. به‌ ده‌رکه‌وتنی بچووکترین نیشانه‌ی پێگه‌یشتن و ژن‌بوونمان له‌ جه‌سته‌ و سیمادا، هه‌موو ئه‌و ئازادییه‌ سنووردارانه‌ی که‌ وه‌ک کیژۆڵه‌یه‌ک هه‌مانه‌ له‌ کیسمان ده‌چێ.

 ناموس؛ ئه‌و وشه‌یه‌ی هه‌ره‌ زێده‌ مرۆڤی له‌سه‌ر ده‌کوژرێ، به‌ بڕوای من وشه‌یه‌که‌ که‌ ئێمه‌ی ژن ده‌بێ هه‌ره‌ زێده‌ به‌ دوای بکه‌وین. چونکه‌ ئه‌و هه‌رگیز ده‌ستبه‌ردارمان نه‌بوو. پاش به‌سه‌رچوونی سیستمی دایک ـ ژن به‌ملاوه‌ ئه‌و به‌رگه‌ی به‌ ژنبوونمان بڕاوه‌، ئه‌و کفنه‌ی له‌به‌رمان کراوه‌، ئه‌م کفنه‌ هه‌ندێ جار بوو به‌ دیارییه‌کی به‌نرخ بۆ ئامێزی یه‌که‌م شه‌وی گه‌وره‌ میرێک. ئه‌مرٍۆکه‌ش ژن به‌م کفنه‌وه‌ له‌ناو ململانێیه‌کدا ده‌ژی. له‌ شوێنێک باوکێک له‌به‌ر ئه‌وه‌ی کچه‌که‌ی له‌ رادیۆوه‌ گۆرانیه‌کی پێشکه‌ش به‌ خۆشه‌ویستانی کردووه‌ ده‌یکوژێ. له‌ جێیه‌کی تر باوک یان برا گه‌وره‌، کچ، ژن یان خوشکه‌که‌ی بۆ پاره‌ ده‌فرۆشێ. واتا ژن پاش مردن ئه‌م کفنه‌ له‌به‌ر نه‌کات. هه‌ر له‌کاتی له‌ دایکبوونیه‌وه‌ له‌به‌ری ده‌کرێ. واتا ئه‌وانه‌ی به‌ زۆر کفنی له‌به‌ر ده‌که‌ن، پێی ده‌ڵێن "تۆ هه‌رگیز ناژی!" هیچ روانینێک هی ئه‌و نیه‌. له‌به‌ر ئه‌وه‌ی چاوی لێ کردووه‌ و چاوی لێکراوه‌، لێی ده‌درێ. که‌ پێویست بوو به‌ پاره‌ش ده‌گۆڕدرێته‌وه‌. له‌ پێناو بوونی به‌رده‌وامی ئه‌م کفنه‌دا کچان و ژنان هه‌ر کات له‌ نێوان په‌نجه‌کانی ئه‌واندا ژیاوه‌ و ده‌ژی.

 ده‌ستی له‌ گه‌لێک جوانی نه‌دا، ده‌سته‌کانی وێ راناگه‌ن، چێژ و ره‌نگ و بۆنی گه‌لێک جوانی یان نه‌زانی، ناشیزانن. گه‌لێک جوانی، نه‌دی، چاوه‌کانی نایبنن. بێجگه‌ له‌ خۆی هی هه‌موو که‌سه‌، به‌ کفنیشه‌وه‌ بێ تاکه‌ هه‌لومه‌رجی درێژه‌پێدانی ژیانی، بێ ئه‌وه‌ی له‌ نرخه‌که‌ی که‌م بکاته‌وه‌ هه‌ڵگرتنی ئه‌و خه‌زێنه‌ گرانبه‌هایه‌یه‌ که‌ هی ئه‌و نیه‌، به‌ڵام ده‌یانه‌وێ پێی هه‌ڵگن: ناموس! قه‌رزێک له‌سه‌رم ! شمشێری سه‌ر ئه‌ستۆم! کفنی به‌رم، بته‌وێ دایکه‌نی له‌به‌رت یان هه‌ڵیگری هه‌ر کفن، بژی و بشمری هه‌ر کفن. جلکێکی یه‌کده‌ست که‌ کلتوری توندوتیژی جا خوێناوی بێ یان بێ خوێن بێ، به‌ ژنمانی بڕیوه‌. کێ بۆ پاراستنی چی ئه‌م کفنه‌ی له‌به‌ر ئێمه‌ کردووه‌؟ له‌پێناوی چ به‌رژه‌وه‌ندییه‌ک؟

ناموس !.. داگیرکارییه‌کی هه‌تاهه‌تاییه‌ که‌ سه‌رتاپای ژن له‌ خۆوه‌ ده‌گرێ. چۆن کێڵگه‌ و زه‌وی هی خاوه‌نه‌که‌یه‌تی، جه‌سته‌ ژنیش وه‌ها هی پیاوه‌که‌یه‌تی. باوک تا ئه‌وکاته‌ی به‌ مێردێکی ده‌فرۆشێ باش ئاگاداری ده‌بێ. مێرد تا سه‌ر مردن ده‌یپارێزی. بۆچی ئاگاداری کردن له‌ جه‌سته‌ی ژن ئه‌وه‌نده‌ گرینگه‌؟ که‌ی ئه‌م ئه‌قڵییه‌ته‌ په‌ره‌ی سه‌ند؟ ژنێک که‌ خواژنی هه‌موو گه‌ردون و خێوی هه‌موو خاکی سه‌ر زه‌مین بوو، چۆن بوو به‌ زه‌وی و کێڵگه‌ی پیاو؟ ئه‌گه‌ر بێت و مێژووی ئه‌م وه‌رسووڕانه‌ و پێشینه‌ی مێژوویی نه‌زانین، له‌ به‌رامبه‌ر ئه‌و تاوانانه‌ که‌ به‌ خوێنی من و له‌سه‌ر ناوی ناموس ده‌کرێن، هه‌موو چالاکی و زانیارییه‌کانمان به‌ نیوه‌چڵی ده‌مێننه‌وه‌. له‌ چاخه‌ دێرینه‌کاندا ده‌سته‌واژه‌گه‌لی ناموس و ره‌وشت و خووڕه‌وشت نه‌بوون. ئه‌و سه‌رده‌مه‌ی هێشتا هه‌ڵگری به‌هاکانی دایکێتی و ژنێتی بوو. چونکه‌ هیچ شتێک موڵکی هیچ که‌سێک نه‌بوو، ئینجا له‌شه‌کان هی که‌س نه‌بوون، ژن هی ژن بوو. ده‌زگاکانی مێینه‌ی، وێڕای جه‌سته‌ی خۆی بوو، بێ که‌وشه‌ک بوو. روانینی، که‌نینی، چاوه‌کانی، به‌رۆکی هه‌موو شتێکی ئازاد بوو. پووکانه‌وه‌ و دابه‌زین نا، به‌ڵکو گه‌وهه‌ری هه‌ڵمشان و به‌رزبوونه‌وه‌ بوو. له‌ چاوی پیاودا هه‌موو شتێکی ژن ته‌نانه‌ت لایه‌نی ره‌گه‌زێتی پیرۆز بوو. عه‌یبه‌، منداڵی ئه‌و سه‌رده‌مه‌ و شه‌رمیش زانستی ئه‌و قۆناخه‌ نه‌بوو. ده‌سته‌واژه‌کانیشیان هه‌تا ئه‌و کاته‌ی مرۆڤه‌کان بۆ ئاواکردن و پاراستنی ده‌سه‌ڵاتیان به‌کاریان نه‌هێنابوو، بوونیان نه‌بوو.

له‌ کۆمه‌ڵگای دایک سالاردا هه‌موو شتێک هی دایک بوو. واتا هی ژن بوو. هه‌ڵبه‌ت جه‌سته‌شی هیچ خۆی بوو. کۆمه‌ڵگای باوک سالار به‌ درێژایی چه‌ندین هه‌زار ساڵ به‌ شه‌ڕێکی نه‌پساوه‌ی بێ به‌زه‌یی ئه‌م هێزه‌ کۆمه‌ڵایه‌تییه‌ی تێپه‌ڕاند و ئاداری له‌سه‌ر پاداری نه‌هێشت. زۆری وه‌پاش خست؛ ناشتی. هه‌رده‌م ویستی بیسڕێته‌وه‌ و ده‌رفه‌تی ژیانی پێ ره‌وا نه‌بینێ. ئه‌مه‌ش به‌ خوڵقاندنی ترس و دڵه‌کوته‌ وه‌سه‌ر خست. ترس و دڵه‌کوته‌ی له‌سه‌ر کێ، چۆن و بۆچی خوڵقاند؟ له‌سه‌ر ژن به‌ ره‌شه‌کوژی و تێکشکاندنی ژن و بۆ روخاندنی کۆمه‌ڵگای ژن ـ دایک سالار. به‌ خه‌یاڵیان دا بێنن ئه‌وه‌ی که‌ من له‌ دوو رسته‌دا کورتم کرده‌وه‌، لانی که‌م له‌ دوو هه‌زار ساڵدا جێبه‌جێ کراوه‌. هه‌ر وه‌ک ئه‌و شتانه‌ی که‌ ژن ده‌ستبه‌رداریان نه‌ده‌بوو بۆ ئه‌و ژیانی بوون، بۆ پیاویش سه‌رکه‌وتن مژارێکی ژیانی بوو. هه‌ر ناوێکی لێ ده‌نرێ بنرێ، شه‌ڕێکه‌ و قه‌وماوه‌. هه‌ر وه‌ک کتێبی پیرۆزیش ئاماژه‌ی پێ ده‌کات له‌ دژی به‌هاکانی ژن، شه‌ڕێکی لێواولێو له‌ تۆقاندن و بێ به‌زه‌یی له‌ ئارادا بووه‌. له‌ سه‌رده‌می ئه‌م شه‌ڕه‌ دڕندانه‌یه‌دا، تاوانه‌کانی ناموس وه‌ک ئامرازێکی کۆنترۆڵکردن و چاودێریکردنی له‌ش و هێزی ژن، له‌ دژی ژن پێک ده‌هێنرێ. بۆ یه‌که‌م جاریش له‌نێو عیبرانیه‌کاندا ئه‌نجام ده‌درێ. واشیان نواندووه‌ گوایه‌ ئه‌مه‌ فه‌رمانی خوداوه‌نده‌. ژن و دیارده‌ی ناموس، هه‌ر له‌ هاتنی عیبرانیه‌کان بۆ سه‌ر سه‌کۆی مێژوو تا ئێستا هه‌مان واتای یه‌کترمان هه‌یه‌. ته‌نانه‌ت له‌ یاساکانی (حه‌موڕابیش)دا که‌ زۆر بێ‌به‌زه‌ییانه‌ نێوزه‌د ده‌کرێ، کوشتنی ژن به‌ناوی ناموس بوونی نیه‌. هه‌ر له‌و ده‌مه‌وه‌ که‌ عیبرانیه‌کان وه‌ک قه‌ومێک که‌ له‌گه‌ڵ‌ ژنان و خواژنه‌کان هه‌ڵناکه‌ن، ده‌رکه‌وتوونه‌ته‌ سه‌ر سه‌کۆی مێژوو، ئه‌خلاق، ناموس، گوناح و کوشتنی ژنان ده‌ست پێ ده‌کات. ناموس له‌ ناواخنی خۆیدا وه‌ک پره‌نسیپێکی بنه‌ڕه‌تی دامه‌زراندنی پێکهاته‌ی کۆمه‌ڵایه‌تی پیاو ـ باوکسالار، بۆ به‌رده‌وام کردنی موڵکایه‌تی خوڵقێنراوه‌. تا ئه‌مڕۆش له‌ زۆر شوێنی جیهان به‌تایبه‌تیش له‌ رۆژهه‌ڵاتی ناوین گیان ده‌ستێنێ. سه‌ره‌تاش له‌ پاکیزه‌یی کچێکی لاو که‌ وه‌ختی شووکردنی هاتووه‌ ده‌ستنیشان ده‌کرێ. یان کاتێ ژنێکی به‌شوو، واتا موڵکی پیاوێک له‌ لایه‌ن پیاوێکی تره‌وه‌ ده‌ستدرێژی بکرێته‌ سه‌ر یان له‌گه‌ڵ‌ پیاوێکی تر بخه‌وێت ده‌رده‌که‌وێته‌ روو. له‌م دۆخانه‌شدا سزای مه‌رگ ده‌درێ. ئه‌گه‌ر کچێکی پێگه‌یشتوو پاکیزه‌ نه‌مابێ، له‌ به‌ر ده‌رگای ماڵی باوکی و تا سه‌ر مردن به‌ردباران ده‌کرێت. ئه‌مه‌ ئه‌گه‌ر کچی راهیبێک بێ ئاگری تێبه‌ر ده‌ده‌ن، سزاکان زۆر بێ‌به‌زه‌ییانه‌ن، چونکه‌ پیاوه‌کان و دامه‌زرێنه‌رانی کلتور و ئه‌قڵییه‌تی پیاو له‌ هه‌ستانه‌وه‌ و سه‌رهه‌ڵدانه‌وه‌ی پێکهاته‌ی کۆمه‌ڵایه‌تی دایکسالار و جیهانی ژن که‌ دوو هه‌زار ساڵه‌ به‌ زوڵم و سته‌م رووخاندوویانه‌ ده‌ترسن. بۆ ئه‌وه‌ی ئه‌م مۆته‌که‌یه‌ وه‌ڕاست نه‌گه‌ڕێ، که‌سێتی سه‌ره‌کی مۆته‌که‌که‌ به‌ردباران ده‌که‌ن، دیسووتێنن و سوکی ده‌که‌ن. یه‌کێک له‌ پره‌نسیپه‌ به‌هێزه‌کانی جیهانی ژن و کۆمه‌ڵگای دایکسالارییش ئازادی و سه‌ربه‌خۆیی ره‌گه‌زی و جه‌سته‌یی ژنه‌. ئه‌گه‌ر جه‌سته‌ کۆت و پێوه‌ند بێ، ئه‌وا رۆح، هزر و دڵیش بۆ یه‌خسیربوون کراوه‌یه‌. ئه‌گه‌ر جه‌سته‌ هه‌ڵفڕی و بشچێت، ئه‌و شوێنه‌ی که‌ ئاره‌زوی کردووه‌ رۆح و هزر و دڵیش ده‌توانن بفڕن و بۆ ئه‌وێنده‌رێ بچن. به‌ڵام کاتێ جه‌سته‌ بیه‌وێ بفڕێ و بچێ و ئه‌وێ ده‌مێ سزا بدرێ، رۆحیش ده‌سته‌مۆ ده‌کرێ، کۆیله‌ ده‌کرێ. راهیبه‌ عیبرانیه‌کان به‌ باشی ده‌رکیان به‌مه‌ کردووه‌ و په‌تی "ناموس"یان له‌ ئه‌ستۆی ژن کردووه‌. هه‌ڵبه‌ت ئه‌م په‌ته‌شیان له‌ ئێسک و پرووسکی ژنانی ره‌جم کراو و خۆڵه‌مێشی سووتێندراو هۆنیوه‌ته‌وه‌. دینی حه‌زره‌تی عیسا و حه‌زره‌تی محه‌مه‌د چه‌نده‌یان ئه‌م راستییه‌ بگۆڕن؟ له‌به‌ر ئه‌وه‌ی روانگه‌یان بۆ ژن هه‌مان روانگه‌ بوو پێیان نه‌گۆڕدرا.

 به‌ گوێره‌ی هه‌ر سێ دینه‌که‌ ئێمه‌ حه‌وا بوین، ده‌سته‌خوشکی خیانه‌ت، ناوی قوڕبه‌سه‌ری و چه‌رمه‌سه‌ری بوین. ده‌بوا چاودێرییان بکردباین، له‌به‌ر ئه‌وه‌ی وه‌ک ئه‌قڵ و رۆح له‌ ژێره‌وه‌ بووین و له‌ به‌کارهێنانی هێز و توانای به‌ده‌نیمان بێ‌به‌ری بووین. ده‌بوا هه‌ندێ به‌ ناوی ئێمه‌ ئه‌مه‌ پێک بێنین. ئه‌وانه‌مان که‌ ئه‌مه‌یان په‌سند نه‌ده‌کرد "وه‌ک حه‌وا به‌هۆی بیری کورتیان" ده‌بوا سزا بدرێن. هه‌ڵبه‌ت هه‌ر واش کرا. ده‌شکرێ له‌نێو خاچپه‌رسته‌کانیشدا ده‌نگمان له‌ کلێسه‌ قه‌ده‌خه‌ ده‌کرێ، ئێمه‌ گوناهێکی هه‌تاهه‌تایین. له‌نێو ئیسلامیشدا کێڵگه‌ی پیاوین و چۆنی بوێ ئاوا ده‌مانکێڵێ. ئه‌وانه‌ین که‌ چێژ و زه‌وق له‌ جه‌سته‌مان وه‌رده‌گرێ. ژن هونه‌ری نوسینی دۆزییه‌وه‌، به‌ڵام پیاو مێژووی نوسیه‌وه‌ و ده‌ینوسێته‌وه‌، ژن نوسینی دۆزییه‌وه‌ به‌ڵام ژن مه‌حکومی مێژووی نه‌نووسراو کرا. به‌ هه‌زاران ساڵ پێنوس و شمشێر له‌ ده‌ستی پیاودا بوو. مێژووی به‌ پێنووس نوسییه‌وه‌ و بۆ ئه‌وانه‌ش که‌ ئه‌م مێژوویه‌یان په‌سند نه‌بوو به‌ زه‌بری شمشێری مێژووی نووسییه‌وه‌. پێنوس و شمشێر ئێستاش له‌ده‌ستی پیاودان، که‌وایه‌ هیچ شتێک نه‌گۆڕاوه‌.

 ناموس، وه‌ک فه‌رموده‌یه‌کی خودایه‌ که‌ چاودێری جه‌سته‌ و ئه‌ندامه‌کانی مێینه‌یی ژن ده‌کات و که‌سیش ناتوانێ ده‌ست له‌م فه‌رموده‌یه‌ وه‌ربدات. هه‌ر بۆیه‌ ره‌شه‌کوژی ژنان ساڵه‌های ساڵ‌ بێ راوه‌ستان پێکده‌هات. ئه‌مڕۆکه‌ش له‌ ناوه‌ڕۆکدا جیاوازییه‌کی ئه‌وتۆی نیه‌. به‌ گوێره‌ی ئاماره‌کانی "UN" ساڵانه‌ له‌ جیهاندا پێنج هه‌زار تاوانی ناموس روو ده‌دات، واتا پێنج هه‌زار ژن ده‌کوژرێ. مسۆگه‌ر ئاماری راسته‌قینه‌ له‌ سه‌روی ئه‌مه‌وه‌یه‌. چونکه‌ گه‌لێک تاوانی به‌ ده‌مامکی خۆکوژی دیزه‌ به‌ ده‌رخۆنه‌ ده‌کرێن. زۆربه‌یان به‌ ئه‌نقه‌ست ناچاری خۆکوژی ده‌کرێن. تاریکی و دڕنده‌یی چاخی ناوین له‌ سه‌ده‌ی بیست و یه‌کدا، له‌و گۆشه‌یه‌ی که‌ ئه‌قڵییه‌تی پیاو خۆی تێدا حه‌شار دراوه‌، ده‌رده‌که‌وێ. ئه‌م چاخه‌ مۆدێرنه‌ هێشتا ژنانی له‌ چاره‌نووسێکی وه‌ک جادووگه‌ره‌کان رزگار نه‌کردووه‌. تاکه‌ جیاوازی ئه‌وه‌یه‌ مۆدێرنانه‌ ده‌سوتێین، به‌ڵام هه‌ر ده‌سوتێین؛ هه‌ر ده‌مانسوتێنن. رۆح و جه‌سته‌ی ژن هه‌زاران ساڵ‌ به‌ ئازادی ژیاون، زۆر به‌ر له‌ کۆیله‌بوونی له‌ جینه‌کانی یاخود خانه‌کانی ئازادی هه‌ڵگرتووه‌. ئێستاش کاتێ له‌گه‌ڵ ره‌وتی زه‌مان ده‌بیچته‌ بینه‌ری ئه‌و ئاسته‌ی که‌ تێی که‌وتووه‌، کاردانه‌وه‌یه‌کی زۆر توند له‌خۆی نیشان ده‌دات. ره‌نگه‌ له‌ کوشتنی خۆیدا، خۆکوژی کۆمه‌ڵگا ئاماده‌ ده‌کات. به‌ناوی ده‌سته‌به‌رکردنی دۆزه‌خی جیهان و به‌هه‌شتی جیهانه‌که‌ی تر، هه‌ر سێ ئایینه‌ گه‌وره‌که‌ فه‌رمانی مردنمان ده‌رده‌که‌ن، بۆ ئه‌مه‌ش له‌ ئێمه‌ی ده‌وێ ناموسمان بپارێزین، به‌ڵام هیچ مه‌رجێک بۆ پیاو له‌ گۆڕێ نیه‌. به‌هه‌شتی ئه‌م جیهانه‌ و به‌هه‌شتی جیهانه‌که‌ی تریش هی ئه‌وانه‌. جیهانێک که‌ تێیدا ژن ئازار و ئه‌شکه‌نجه‌ی دۆزه‌خ ده‌چێژێ، چۆن ده‌شێ ببێته‌ به‌هه‌شتی پیاو؟!

 باران بارانه‌ ته‌ڕ ده‌کا؟ رۆن چه‌ور ده‌کات؟ به‌فر ره‌ق هه‌ڵدێنێ؟ ئه‌ڤین، شه‌رم له‌ ئه‌ڤین ده‌کات؟ ژن ژیان پیس ده‌کات؟ "ژن ژیانه‌: شه‌رمی ده‌وێ؟ ژن بێ ژیان پێناسه‌ ده‌کرێ؟ وایان گوت؛ وا ده‌ڵێن مێژوومان به‌ داستانی حه‌وا ده‌ست پێده‌که‌ن، ژن له‌ ژیان و ژیان له‌ ژن داده‌بڕێنن. پاشان ژیانیان ده‌وێت. به‌ ناوی ناموس ده‌یکه‌ن، به‌م هۆیه‌ ده‌بێ له‌ پێناو ژیاندا به‌ دوای ناموس بکه‌وین. ئه‌گه‌ر به‌ دوای مێژوومان نه‌که‌وین قه‌ت له‌مه‌ تێناگه‌ین که‌ چۆن به‌ تاقه‌وشه‌یه‌ک (ناموس) ئه‌وه‌نده‌مان لێ ده‌ده‌ن. ئه‌رێ، ده‌بێ به‌ دوای کفنه‌که‌مان بکه‌وین، تا ئه‌و کاته‌ی ده‌گه‌ینه‌ سه‌رده‌مێک که‌ بێ کفنین، ده‌بێ به‌ مێژوودا هه‌نگاو بنێین و بێجگه‌ له‌مه‌ هیچ رێگا و چاره‌یه‌کمان بۆ دۆڕاندنی نیه‌.

 تا ئه‌و کاته‌ی ناموس له‌ کۆڵمان ده‌بێته‌وه‌، ده‌بێ راوه‌دووی نێین. تا ئه‌و کاته‌ی جه‌سته‌ و مێیینه‌یی و ئێمه‌ ببینه‌ هی خۆمان، تا شکاندنی ئه‌و چاودێرییه‌ی که‌ له‌سه‌ر جه‌سته‌مانه‌، تا ئه‌وه‌ی ناموس ئیتر قه‌فه‌ز، کفن، چاره‌نوس و ناسنامه‌مان نه‌بێت. جاران شاربه‌شار لێیانداین، گوند به‌ گوند، ناوچه‌ به‌ ناوچه‌ له‌ ناویان ده‌بردین. ئه‌وانه‌شمان که‌ مانه‌وه‌ یه‌خسیر کران. به‌ته‌نێیان هێشتنه‌وه‌. ئێستاش یه‌ک به‌ یه‌ک ده‌مانپێکن. به‌ گوێره‌ی ئاماره‌کانی نه‌ته‌وه‌ یه‌کگرتووه‌کان هه‌موو ساڵێ پێنج هه‌زار ته‌رممان لێ ده‌که‌وێ. پێنج شارۆچکه‌یه‌که‌. گۆڕی ئێمه‌ شارۆچکه‌ به‌ شارۆچکه‌ هه‌ڵده‌که‌نن، ئێمه‌ یه‌ک به‌ یه‌ک زیندوو ده‌بینه‌وه‌. گوند به‌ گوند و شارۆچکه‌ به‌ شارۆچکه‌ به‌رهه‌ڵست ده‌بینه‌وه‌ و شار به‌ شار یاخی ده‌بین، راده‌په‌ڕین. بۆ ئه‌مه‌ش با سه‌ره‌تا ته‌نیاییه‌کانمان له‌ گۆڕ نێین. له‌ به‌رامبه‌ر جه‌للاده‌ تاوانباره‌کان که‌ هه‌موو ته‌مه‌نه‌یان ره‌جم کردین، یه‌کتر به‌ ته‌نیا نه‌هێڵینه‌وه‌ و به‌ ته‌نیاش نه‌مێنینه‌وه‌، ده‌شێ تۆڵه‌ی تاوانه‌کانی ناموس گه‌لێک دور بێ، به‌ڵام ئه‌و شارۆچکانه‌ی به‌ ته‌رمی پێنج هه‌زار ژن و ته‌رمی هه‌زاران منداڵ و لاو ساز کراون، له‌ تۆ دوور نین. ترس ئێمه‌ی یه‌خسیر کرد. دیلین به‌ڵام ئه‌وه‌ی راده‌ست بووه‌، ئه‌وه‌ نیه‌ که‌ خیانه‌تی کردووه‌. قه‌فه‌زی ناموس ده‌شکێنین... تاجی زێڕین و که‌له‌پچه‌ و ده‌سبه‌ندیش.

 

 

کاتێک ئازادی ژن روو لەگۆڕەپانی سیاسەت دەکات

بابەتی ئەشق کە لەجیهانی ئەمڕۆماندا وەک بنێشت لەهەموو زارێکدایە لەهیچ قۆناخێکی مێژوودا بەمڕادەیە ژێرپێ نەخراوە. لەئەشقی کوێرانەى لەناکاوو ساتەوەختیەوە تادەگاتە هەڵوێستە ئاشکراکانی تاوانباری، تەنانەت مەترسیدارترین و وشکترین و...

خێزان, موڵک, جنسیه‌تگه‌رایی

سه‌رمایه‌داری وه‌کو قه‌سابێک جه‌سته‌ی ژن، پارچه‌ پارچه‌ ده‌کا و بۆ هه‌ر پارچه‌یه‌کیش به‌ها دیار ده‌کات ...

پرسی ژن چیە

پێویستە ژن وەكو كۆكراوەی هەموو سیستم ببینرێ و بەم رەنگە ئانالیز بكرێت ...

2017 © Partiya Karkerên Kurdistan (PKK)
[email protected]