21.09.2017

دكتۆر سیروان رەمزی نەتەوەیەك بوو

لە ساڵی 1996دا لە ناوچەی ئاغجەلەر بەر هێرشی چەكدارەكانی (پ.د.ك) دەكەوێت و لەگەڵ چوار لە هەڤاڵانی شەهید دەكرێن ...

 

 

 

 

 

رۆژی  وڵات

 

نۆزدە ساڵ تێدەپەڕێت بەسەر تیرۆركردنی یەكێك لە رۆژنامەوان و سەركردە كارا و شۆڕشگێڕەكانی تێكۆشانی ئازادی گەلی كورد لە باشووری كوردستان، كە ئەویش شەهید دكتۆر سیروانە.

دكتۆر سیروان ناوی تەواوی خۆی (كاوە عەلی ساڵح)ە، لە ساڵی"1964" لەگوندی چەمیاڵەی ناوچەی شارباژێڕ، كە ‌دەكەوێتە باكووری رۆژهەڵاتی شاری سلێمانی لەدایك بووە. ساڵی "1965" بنەماڵەكەیان هاتۆتە شاری سلێمانی و هەر لەو شارەدا ساڵی "1971" دەچێتە بەر خوێندن و قۆناخەكانی سەرەتایی و ناوەندی و ئامادەیی بە سەركەوتوویی تەواو دەكات. ساڵی "1983"لە زانكۆی بەغداد لە كۆلیژی زانستەكان وەردەگیردرێت و لەساڵی"1984"دا بەهۆی چالاكییە سیاسییەكانییەوە شەهید دكتۆر سیروان دەستبەرداری خوێندنی زانكۆی دەبێت.

شەهید دكتۆر سیروان لە كۆتایی ساڵانی حەفتا‌كانی سەدەی رابردوودا هەست بە تاڵاوی ژیانی گەلەكەی دەكات و لەرووی چینایەتی و نەتەوەییەوە هەستەكانی خۆی پێشدەخات و ئاشنایەتی لەگەڵ پرسە سیاسییەكانی ئەو كاتەدا پەیدا دەكات و تا لەساڵی"1980"دا پەیوەندی بە رێكخستنەكانی (كۆمەڵەی رەنجدەرانی كوردستان)ەوە دەكات و هەنگاو بە هەنگاو هۆشیاری سیاسی خۆی بەرز دەكاتەوە و لەماوەی سێ ساڵدا چەندین چالاكی سیاسی و سەربازی ئەنجام دەدات. دكتۆر سیروان هەمیشە بەوردی ئاگاداری پێشكەوتن و گۆڕانكاری دۆخەكە بوو و لەگەڵ هەر گۆڕانكارییەكدا بۆچوون و هەڵوێستی خۆی راشكاوانە خستۆتەڕوو. هەر لەسەرەتای كاری سیاسی خۆی لەناو (كۆمەڵەی رەنجدەرانی كوردستان)دا كە بەتەمەن "20"ساڵ كەمتر بوو و وەك كادیرێكی سیاسی قاڵبووەوەی ناو خەبات رەفتاری دەكرد و لەگەڵ گۆڕانكارییەكانی ئەو كاتەی باشووری كوردستان و گەرمبوونی شەڕی ئێراق - ئێران و هاتنە پێشەوەی گفتوگۆی نێوان یەكێتی نیشتمانی كوردستان لەگەڵ رژێمی ئێراق، كە كۆمەڵەش بەشێك بوو لە (ینك)، ئەو هەڵوێستی خۆی بە رەتكردنەوەی ئەو سیاسەتە دیاركرد و ریزی كۆمەڵەی بەجێهێشت. چونكە گەیشتبووە ئەو باوەڕییەی (ینك) لەدیاریكردنی دۆست و دوژمن و ئاراستەكردنی هێزی گەل بەهەڵەدا چووە.

دكتۆر سیروان لە ساڵی"1984"دا بەناچاری روودەكاتە رۆژهەڵاتی كوردستان، پاش مانەوەی زیاتر لە ساڵ و نیوێك لەوێ، ئاشنایەتییەكی باش سەبارەت بە ژیان و دۆخی گەلەكەمان لەو پارچەیەی كوردستان پەیدا دەكات و فێری زمانی فارسی دەبێت. لە ساڵی "1985"دا رووی كردە وڵاتانی ئەوروپا و لە وڵاتی دانیماركدا جێگیر دەبێت.

پاش ماوەیەك لەوێ ئاشنایەتی لەگەڵ بیروبۆچوونی نەتەوەیی و مرۆڤایەتی و پێشكەوتنخوازانەی بزاڤی پەكەكە پەیدا دەكات و بەهیوا و باوەڕییەكی تۆكمەوە تەڤلی ریزەكانی پارتی كرێكارانی كوردستان دەبێت و چالاكانە دەكەوێتە ناو خەباتی رێكخستنی جەماوەری و دیبلۆماسی لە وڵاتانی ئەسكەندەنافیا بەتایبەتی و ئەوروپا بە گشتی. لەبەر پێویستی كارو خەباتی رێكخستنی و دیبلۆماسی فێری زمانەكانی ئینگلیزی و سوێدی و دانیماركی دەبێت. نزیكەی سێ ساڵ كاری راگەیاندنی و هۆشیاركردنەوەی گەل و كۆكردنەوەی كۆمەك ئەنجام دەدات.

هەر لەكاری دیبلۆماسی و پەیوەندییەكاندا لەگەڵ زۆربەی كەسایەتی و رێكخراوە شۆڕشگێرییەكانی رۆژهەڵاتی ناوەڕاست و دونیادا پەیوەندییەكی باش و چالاكانەی پێشخست.

دكتۆر سیروان باوەڕییەكی پتەوی بە كاری رێكخستنی هەبوو، لەدژی هەر جۆرە كارێكی سەرەڕۆیی بوو، لەهەموو كار و هەڵسەنگاندنێكدا بەشێوەیەكی زانستیانە تاوتوێی مەسەلەكانی دەكرد. دكتۆر سیروان لە ئەوروپادا نموونەی كەسێتییەكی شۆڕشگێڕ و نیشتمانپەروەر و لەخۆبوردوو بوو. بۆیە هەر بە خەبات لە ئەوروپاوە نەوەستا و لەكۆتایی هەشتاكاندا بەرەو گۆڕەپانی خەبات لە كوردستان دەگەڕێتەوە. سەرەتا بە مەبەستی بینینی خولێكی پەروەردەیی لەلایەن رێبەری گەلی كورد عەبدوڵڵا ئۆجەلان، دەچێتە گۆڕەپانی سەرۆكایەتی پەكەكە لە دۆڵی بیقاعی لوبنان. لەوێ لە ئەكادیمیای مەعسوم قۆرقمازدا خولی پەروەردەیی خۆی بەسەركەوتوویی تەواو دەكات و لەرووی فیكری و سیاسی و گەریلاییەوە خۆی قووڵدەكاتەوە و كەسێتی خۆی تۆكمەتر و بەهێزتر دەكات.  پاش كۆتایی خولی پەروەردەیی دەچێتە گۆڕەپانی تێكۆشانی گەریلایی لەباكووری كوردستان و تەڤلی خەباتی گەریلایی دەبێت. لەگەڵ گۆڕانكارییەكانی شەڕی كەنداو و هاتنە پێشەوەی رووداوەكان دكتۆر سیروان لەسەر رێنمایی رێبەری گەلی كورد عەبدوڵڵا ئۆجەلان بەشداری لە راپەڕینە جەماوەرییەكەی ساڵی "1991"دا لەناوچەكانی زاخۆ و حەفتانیندا دەكات.

شەهیدی نەمر دكتۆر سیروان بەوردی لەسەر رووداو و پێشهاتەكانی باشووری كوردستان راوەستە دەكات و لە رێكەوتی "01.04.1991"دا رۆڵێكی كاریگەر لەدامەزراندنی پارتی ئازادی كوردستان (پاك) دەبینێت. لەسەرەتای مانگی ئایاری 1991دا راستەوخۆ دەچێتە گۆڕەپانی خەباتی ناو شارەكانی باشووری كوردستان و لەڕووی سیاسی و ئایدیۆلۆژییەوە رۆڵێكی كاریگەر دەبینێت لە هۆشیاركردنەوەی جەماوەر و پەردەلادان لەسەر پیلان و دەستێوەردانەكانی زلهێزەكانی جیهان و دوژمنانی گەلەكەمان. لێبڕاوانە و بە بەرپرسیارێتییەكی مەزنەوە هەوڵدەدات تیشكی زانستیانە بخاتە سەر هەڵە و كەموكوڕییەكانی بزاڤی كورد بەگشتی و باشوور بەتایبەتی. هەروەها رۆڵێكی كارای بینی لە ناساندنی راستینەی شۆڕشی ئازادیخوازی گەلی كورد بە پێشەنگایەتی پەكەكە دەبینێت.

لەكاتی شەڕی ساڵی "1992"ی هێزە دەسەڵاتدارەكانی باشوور دژ بە بزاڤی ئازادیخوازی كورد، دوای شەڕێكی قورسی پازدە رۆژە  دكتۆر سیروان بریندار دەبێت. بەڵام بە ورەیەكی بەرزەوە گۆڕەپانی بەرخودان چۆل ناكات و هاوشانی هەڤاڵانی لەبەرخۆداندا دەبێت.

دوای كۆتاییهاتنی شەڕەكە وەك فەرماندەیەكی لێهاتوو فەرماندارێتی كامپێكی پەروەردەیی لەئەستۆ دەگرێت و شەڕڤانانی ئازادی پەروەردە دەكات و لەرووی ئایدیۆلۆژی و سیاسی و مێژوویی و تێكۆشانی گەریلاییەوە سەرپەرشتی چەندین خولی پەروەردەیی دەكات‌.

 لەساڵی"1994"دا وەك رۆژنامەوان و نووسەر و وەرگێڕێكی بەتوانا سەرپەرشتی رۆژنامەی وڵات دەكات و رۆڵێكی گرنگ دەبینێت لە پێشخستنی رۆژنامەكەدا و خاوەنی قەڵەمێكی بە جورئەت و بەتوانا بوو.

لە ساڵی"1995"دا ئامادەكاری بۆ دامەزراندنی  رێكخراوێكی نەتەوەیی و دیموكراتی دەكات و لە یەكەم كۆنفرانسی هەڵسوڕاوان و تێكۆشەرانی نەتەوەیی و دیموكراتیدا لەبەهاری هەمان ساڵدا رێكخراوی یەكێتی نەتەوەیی دیموكراتی كوردستان (یندك) دادەمەزرێنێت كە دەخوازرا وەك سەكۆیەكی نەتەوەیی و دیموكراتی تێكۆشەرانی باشووری كوردستان بێت. هەر لەهەمان كۆنفرانسدا دكتۆر سیروان وەك سكرتێری گشتی (یندك) هەڵبژێردرا.

ئیتر شەهید د.سیروان وەك سەركردەیەكی دانا و زرنگ لە تێكۆشانی نەتەوەیی و دیموكراتییانەی خۆیدا لەمیانەی خولە پەروەردەییەكان و كۆڕ و كۆبوونەوە جەماوەرییەكاندا پێشەنگایەتی خەباتێكی شێلگێر و بەرخودانخوازانەی دەكرد و تا دەهات  وزە و توانستەكانی خۆی بە مۆڕاڵ و جۆشێكی بەرزەوە دەخستە خزمەت تێكۆشانی ئازادیخوازی گەلەكەی. د.سیروان لەهزر و ژیان و خەبات و تێكۆشانی خۆیدا وەك سەركردەیەكی شۆڕشگێڕی ئازادیخواز و وڵاتپەروەر باوەڕییەكی مەزنی بە ئیرادەی ئازادی گەلەكەی هەبوو و لەپێناوی بەرجەستەكردنی هیوا و ئاواتەكانی گەلەكەیدا بەجورئەت و باوەڕییەكی مەزنەوە لەتێكۆشاندا بوو، هەمیشە دژ بە شەڕی ناوخۆیی هێزە كوردییەكان بوو و یەكێتی نەتەوەیی بە پێداویستییەكی ژیانیی دەبینی و لەپێناو یەكێتی نەتەوەییدا ماندوونەناسانە لە تێكۆشاندا بوو. هەمیشە بە هەڵوێستە نەتەوەیی و نیشتمانی و دیموكراتییەكانی دەناسرا.  تا لە "04.10.1996"دا لەكاتێكدا سەرگەرمی خەبات و تێكۆشانی رێكخستنی بوو، لە ئاوایی (قەڵاچوغەی سەی كەریم) سەر بەناوچەی ئاغجەلەر بەر هێرشی چەكدارەكانی (پ.د.ك) دەكەوێت و لەگەڵ چوار لەهەڤاڵانی بەناوەكانی (حاجی قامشلۆیی، بابان، دیلان ماردینی، عەگید گەرمیانی) شەهید دەكرێن.

   دوای تێپەڕبوونی "19" ساڵ بەسەر تیرۆركردنی سەركردەی شەهید دكتۆر سیرواندا، هێشتا تاوانبارانی ئەو تیرۆرە سیاسییە دەستگیر نەكراون و نەدراونەتە دادگا.

سەری رێز و نەوازش بۆ گیانی بێگەردی شەهیدی نەمر دكتۆر سیروان و تەواوی شەهیدانی رێگای ئازادی...

سەرشۆڕی و روورەشی بۆ تیرۆریستان و بكوژانی دكتۆر سیروان و هەڤاڵانی...

 

 

حه‌قیقه‌ت"شۆرشی نێو شۆرش"

گەیشتن بە حەقیقەت بە هەنگاوە پتەوەکان ناکرێت، ئەگەر لە میانەی شۆرشێکی ژنەوە پێینه‌گه‌ین، بەو پێیەی کە ژن دایکی هەموو چارەسەریەکانە، ئەوەندەی کە دایکی کێشە و پرسەکانە...

"نکۆڵى له‌ خۆم ناکه‌م"

لێکۆڵه‌ره‌که‌ بۆ خۆی دانی به‌وه‌دا نا من ته‌نها بارمته‌یه‌که‌م له‌ ده‌ستیاندا‌ و تا به‌ئامانجه‌کانیان نه‌گه‌ن من ده‌هێڵنه‌وه‌ ...

ئێمه‌ و مردن

له‌ ئێسته‌وه‌ من ئیتر ئه‌بمه‌ ئه‌و جووته‌ پێڵاوه‌ى که‌ دواجار له‌پێى کرد و پێ چووه‌ سه‌ر سێداره‌...

2017 © Partiya Karkerên Kurdistan (PKK)
[email protected]